Hebrews 1
Godokono Tabote Ebeno Gudugodone Atamo Da꞉pemaigiya
1Dopamo Godote a Yu epono ewoniatamo iyaiya gabo epetapido tabo kiyawaonaki, iyo, ebe tetelo ebete ebeno woki awokalimipido ebeno ubi tanalo awokalilamenaki. 2Wiyasiya a walone gudi tetelo me opono uwomu tetete eba tatalilo, ebete opo lumagi idido tabo paliboa꞉no ebeno Gudugodone atamo tabo a꞉pa꞉kiyawaiya. Nanitabola, dopamo ebe Gududo ebete tobolo unu ega꞉walo me opo kawonomo osiyodiloliya, ega꞉walo ebete ebe elawiya me opono uwomu tetenomolo tanalo bilibilinomono Ulamedawama꞉ keda꞉ma꞉. a 3Ebene ebe Gudu ebe Godokono kawo alonomono amama tanalola, ega꞉walo ebete Godoko modoboma꞉ eba eda꞉nalo ibi netewapi kapiyanomola. Nanitabola, tobolo unu ega꞉walo me opono inamabu bilibilinomate wadenomamo ka꞉pola꞉nama꞉, ebete ebeno elawo tabonomamo ibi nulamena. bGodokono Guduno Elawote Ebeno Nopopino Elawo Nodoilina
Numa꞉la꞉, ebe Gudute epono kuba osiyodilole tanalo kegebolelaema꞉ gabo dosiyodiliya, ebete ebe tanalone Unu Duliyomolamo odolote, potele ebolo Kawo Elawodawanomoma꞉ deda꞉na ebe Kawodawano tumudi apuamo gito nokoliya. 4Ebema꞉ Godote ebeno Gudutamo kebe mailo kikamiyale, ebe mailote Unu Duliyomolono nopopino mailo bilibilinomo keba kunu kodoilinale, eba kunu Guduno elawote ibino elawo atumu na꞉kodoilina, mabu Nabiwite ebe Kawodawama꞉ ka꞉midima꞉ nanitabonomolo ebe ebema꞉ lawiya. c5Nanitabola, Godokono nopopi bilibilinomo magumulo ebete idi kapiya ma kunu kaniya꞉,
“A꞉ma꞉ naimano Gudunomolata,
ka꞉lo na a꞉imano Nabiwima꞉ eda꞉mo.”
Ega꞉walo Godote ebeno nopodawa idino tanaloma꞉ ma kunu kegiya꞉,
“Nale ebeno Nabiwima꞉ eba eda꞉nalo,
ebete naimano Gudunomoma꞉ beda꞉namene.” d
6Ebema꞉ numa꞉la꞉, Godote ebeno dopo Gudunomo me opamo paliboma꞉ dolosiyodiliya, ebe tetelo ebete ebeno tanaloma꞉ tabo idi ma kunu kegiya,
“Modobola naimano nopopi bilibilinomate ebe namamatema꞉na꞉.” e
7Ebene ebeno nopopino tanaloma꞉ Godote tabo ma kunu giya,
“Nale naimano nopopi awa popimu a꞉midilinakomo,
iba꞉te naimano ubi tanalamo tudila꞉olo iyaiya ka꞉tolaema꞉.
Iyo, nale ibi ela menamu eba midilinalo,
iba꞉te naimano iyaiya woko bosiyodilolenama꞉na꞉.” f
8Wiyasiya Godote ebeno Guduno tanaloma꞉ ebetamo negiya,
“A꞉ma꞉ nani Godoma꞉ eba eda꞉nalo,
a꞉imano Kawo Elawodawano tanalote
uwomua꞉ tetelo bitanamene.
Ebema꞉ a꞉ma꞉le a꞉imano epono tanalo
tuputupu woki kapiyamo banagilamelelamenakoma꞉ta, g
9ega꞉walo a꞉ma꞉ kuba tanalo osiyodiloma꞉ ubia꞉noma꞉ eba eda꞉nalo,
wadewade tanalo kapiya osiyodilolema꞉
ubi kawonomamo iyatinata.
Me mabuma꞉ potele a꞉imano Godoma꞉ deda꞉na,
ebe Kawodawate me opo epo epetapi uwatea꞉no
a꞉ma꞉ kapiya elawiyata,
iyo, ebete kalakala tanalo kawonomo a꞉ma꞉ unamo adipaniya,
a꞉ma꞉le ebe kalakalago
Kawo Elawodawano okoli bailo kokoliawitama꞉.”
10Ega꞉walo tete idilo Godote ebeno Gudutamo tabo ma kunu kegiya,
“Potele wagilimi mabune tobolo unu ega꞉walo me opo kawonomo
ebeno kotamo dosiyodiloliya,
o Kawodawa, a꞉ma꞉ ebe Elawodawanomolata. h
11Nanitabola, a꞉ma꞉le dosiyodilola꞉wiyala
ebe inamabu bilibilinomate a꞉ka꞉tuwa꞉ kolopoligoma꞉na꞉,
pupuliono inamabuate keba kunu ka꞉kubakubaonakole eba kunu,
wiyasiya a꞉imano tanalo eba kunua꞉,
a꞉ma꞉ uwomua꞉ tetelo bokolinama꞉ta.
12Iyo, me opono inamabuate kolopoligoma꞉,
a꞉ma꞉le a꞉imano ubilo
ibi bilibilinomo iyabaiamo gito kalomoma꞉ta,
lumagite oli kaliku pulima꞉
ebeno tagala kaliku iyabaiamo keba kunu kiyatinakole eba kunu.
Wiyasiya a꞉ma꞉ iyakobi a꞉kolowiaemene,
mabu uwomua꞉ tetelo
a꞉imano igilote a꞉kolopoligonamene.”
13Ega꞉walo me tanalo idila. Godote ebeno nopopi bilibilinomo magumulo idi kapiya ma kunu kaniya꞉,
“A꞉ma꞉ Kawo Elawodawama꞉ eba eda꞉nalo,
modobola a꞉ma꞉ naimano tumudi apuamo na꞉pokoliya,
ebene a꞉ma꞉go gowelaopi
nale ibi a꞉imano agowa puti baima꞉ ka꞉midilimamo.” i
14Ebema꞉ numa꞉la꞉, Godokono ubi tanalote ebeno nopopiatamo keba kunu kitanale? Nanitabola, ebe uliyanate ebe eba amamatenalo, ebete ibi iyaiya alibolenako, piyate igilo mula꞉ tanalo ebegodone delaema꞉na꞉ ebe epo wadenomamo ka꞉nowalubilinama꞉. j
Copyright information for
KNVFLY_RIVER